Ao redor de 300 alumnos dos sete colexios de Moaña viviron unha
xornada de convivencia na natureza coa plantación de árbores autóctonas (ao redor de 700 especies autóctonas frondosas como sobreiras, carballos, freixos, faias, bidueiros, loureiros, castiñeiros, cerdeiras, acevos, nogueiras e érbedos) nos montes de Moaña dentro do programa Aprende Moaña. Despois dun ano
sen poder realizar a actividade do día da árbore por mor da pandemia,
retomouse a celebración deste día co alumnado de segundo de primaria e
tamén co alumnado de terceiro debido a que o ano pasado non se puido
celebrar o Día da Árbore.
Trátase dunha actividade na que as tres comunidades de montes de
Moaña, a de Domaio e, Meira , colaboran na súa realización
posibilitando un encontro das crianzas coa natureza e a súa contorna.
Este ano a comunidade de montes anfitrioa foi a comunidade de montes de
Moaña e o lugar elixido para levala a cabo foi a contorna do miradoiro
da Fraga, onde rapaces e rapazas de Moaña se xuntaron para plantar
árbores autóctonas e gozar dunha xornada no monte e das actividades
organizadas.
Os nenos e nenas foron recibidos pola concelleira de Ensino, Dolores
Chapela e polo presidente da
Comunidade de Montes de Moaña, David Faria.
Despois de recuperar forzas coa merenda a rapazada gozou dunha
animada actuación musical con Cé Orquestra Pantasma e tamén se contou
coa presenza de axentes forestais do distrito que mostraron os seus
equipos e fixeron unha demostración coa motobomba.